На 18 март 2009 година во Белград, членовите на тимот кој го спроведуваше истражувачкиот проект „Спроведување на ОВЖС и СОВЖС процедурите во Македонија“, имаа можност да ги претстават резултатите од проектот пред другите грантисти од програмата „THINK AND LINK”- Regional Policy Programme for Think Tanks and Policy Institutes, финансирана од меѓународната фондација European Fund for the Balkans. За време на состанокот сите организации кои се дел од оваа програма имаа можност да ги презентираат резултатите од своите истражувачки проекти во областа на политиките за животна средина.

Посетата во Белград беше искористена и за учество на еднодневната работилница под наслов „Улогата на независните центри за истражување на политиките (think thanks) во процесот на политиките, и нивната релевантност во ЕУ интеграциите – Студија на случај за политиките за животна средина во Западен Балкан“. Настанот беше во организација на European Fund for the Balkans и Чешката амбасада во Белград. Како панелисти на работилницата беа претставници од think thank организации од Балканот и Централна Европа, кои работат на следење на политиките во различни полиња, а целта беше да се изнесат искуствата како овие независни центри за истражување и следење на политиките може да влијаат врз нивното донесување и спроведување. Како последни панелисти на оваа средба беа и грантистите на програмата „THINK AND LINK”, меѓу кои и претставниците на Македонскиот зелен центар. Сите тие имаа можност да ја претстават ситуацијата со животната средина и политиките за животната средина во Македонија, Албанија, Србија, Косово и Хрватска.